الوصفة السحرية لمطلوع بدون لباب

راني دخلت المختبر نهار الخميس باش نصورلكم مطلوعي العزيز ، على بالي كل واحدة عندها وصفتها للمطلوع اللي ماتحبش تغيرها و كاين بزاف أخوات حاطين وصفات مطلوع هنا في المنتدى، بصح حبيتكم تشوفو الوصفة نتاعي بعد التعديلات المخبرية  لاخاطر أنا نحب المطلوع يكون رقيق و مافيهش اللباب ( مطلوع نتاع فحلات أحم أحم هههههه ) ، بدلت في المقادير حتى جا روووعة، تبعو معايا و شوفو النتيجة :

المقادير: ( درت غير 2 قرصات باش نصورلكم الطريقة ، كان عندي كمية كبيرة نتاع خبز في الدار، درت المطلوع من أجل عيونكم فقط  ) 

* كيلة فرينة ( مقدار قرصة )
* كيلة سميد ( مقدار قرصة )
* 1/2 ملعقة كبيرة خميرة لكل قرصة 
* 1 ملعقة صغيرة ملح لكل قرصة
* سينوج 
* 1 ملعقة كبيرة سكر لكل قرصة 
* 1/2 ملعقة كبيرة زيت لكل قرصة 
* محسن الخبز ما ننصحش بيه لأنه مضر بالصحة و نديرو فقط لما نجرب دقيق جديد و نخاف منو ( خاصة إذا كانو عندي ضياف و نخاف نتبهدل ) وممكن اللي يحب يقدر يعوض محسن الخبز بشوية من خميرة الحلويات 
* ماء دافئ للعجن 

إضغط هنا لرؤية الصورة بحجمها الطبيعي.

الطريقة : 
1- نخلط المكونات الجافة أولا ، ثم نضيف الزيت ثم الماء الدافئ حتى نتحصل على عجين طري 

إضغط هنا لرؤية الصورة بحجمها الطبيعي.

نعجن 5 دقائق و نستعمل طريقة الكيس المبلل للوهرانية : نبلل كيس نظيف و نحط العجين فيه و نغلق الكيس و نخلي العجين يختمر ( أنا خليتها خمرت 2 ساعات لأن المطبخ عندي بارد شتاء و ساخن صيفا  يعني الخدمة فيه ميزيرية صيف وشتاء  )

إضغط هنا لرؤية الصورة بحجمها الطبيعي.

2- بعد ما تخمر نعجنها 5-10 دقائق و نشوف إذا تحتاج ماء نزيدلها ( أنا زدت حوالي فنجان فقط )
3- نقسم العجين على 2 ( لأنني أنا درت 2 قرصات ) و نعجنهم في شوية زيت ( مقدار 1ملعقة كبيرة زيت )
4- نحط القرصات في مناديل و نغطيهم حوالي 5-10د حتى يرتاحو ومايتعبوناش في التقراص
5- نقرص القرصات رقاق ( باش ما يجيش فيهم اللباب ) ونغطيهم و نخليهم يخمرو ( أنا خليتهم 40د لأن المطبخ بااااارد )

إضغط هنا لرؤية الصورة بحجمها الطبيعي.

6- كي يخمرو مليح طيبيهم في طاجين تكوني سخنتيه مليح من قبل ( حواي 20 د ) 
7- أنا شفت أخت دارت موضوع عنوانو مطلوع البيترا و شفت قبيل موضوع الوهرانية نتاع المطلوع ، قالت أنها تغطي الطاجين بصينية لما ترمي فيه القرص و القرصات ينتفخو أكثر لان الحرارة تكون محيطة بالقرصة من كل ناحية ، لذلك قلت نجرب ، وصحيح ، المطلوع انتفخ روعة ، شوفو هنا رميت القرصة الأولى :

إضغط هنا لرؤية الصورة بحجمها الطبيعي.

وهنا غطيت الطاجين بصينية أكبر منو :

إضغط هنا لرؤية الصورة بحجمها الطبيعي.

شوفو كي طاب راهو خفيف والله العظيم مثقب أكثر مما يبان في الصورة ، ماقدرتش نبينهالكم في الصورة لان المطبخ عندي ضاوي بزاف :

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

ياخي بكري كانو يقولو الحرة اللي مطلوعها من الخفة بزاف يطبق على 2 ، شوفو طبقتها غير بإصبع واحد  :

إضغط هنا لرؤية الصورة بحجمها الطبيعي.

وكي مابانوش الثقوب مليح ، حليت قطعة على زوج باش تشوفوه من داخل كيفاه خفيف و مثقب ، شوفو :

إضغط هنا لرؤية الصورة بحجمها الطبيعي.

وهذه قطعة أخرى ، شوفو ما فيهاش اللباب خلاص :

إضغط هنا لرؤية الصورة بحجمها الطبيعي.

ممكن اللي يحب يدهن القرصة كي الطيب بشوية زبدة و لكن صدقوني هشوشة وطرية جدا ما تحتاج والو  

* ملاحظة : أنا درت بحث هذي مدة على المطلوع باش نلقى أحسن وصفة ، يعني ما رانيش نحاول سرقة افكار الغير وننسبها لنفسي و لكن كل ما نشوف أخت عندها إضافة أو طريقة نتاع طياب جديدة كيما طريقة الكيس المبلل او طريقة الصينية اللي فوق الطاجين نجرب و لكن المقادير هاذو أنا ما هزيتهم من حتى وصفة وإنما نتيجة نتاع تجارب كثيرة ، كل مرة ندير المطلوع نبدل في المقادير حتى لقيت الوصفة المثالية .

أتمنى جربوها و تعجبكم ، تحياتي